Mitropolit Antimos: Mazedonien ist kein Staat, sondern ein "Stäätchen" das den Balkan problematisiert
Откако започна усната расправа во Хаг во Грција никој не ги коментира, ниту македонските, ниту грчките аргументи. Единствено Антимос, повторно наместо на литургија, неделното утро го посвети на нашата земја и грчката надворешна политика.
-Дај Боже, господ да ни помогне, да победи правдата, затоа што веруваме дека сме во право. И покрај тоа што подоцна ќе излезе одлуката се надеваме дека ќе биде праведна каква што заслужува нашата Грција, земјата која што постои 3-4 илјади години, наспроти државичката која е создадена неодамна, изјави грчкиот митрополит Антимос.
Митрополитот Антимос, говореше и за новоотворениот музеј во Скопје, за жртвите од Холокаустот во кој има карта на која пишува Македонија, а не Скопје, факт што за Антимос е ширење пропаганда.
Според него Битола и припаѓа на Грција, а македонскиот јазик е идиом. Не изостана ни коментар за откритието на Викиликс за ставот на грчкиот вицепремиер Пангалос, Македонците да се викаат како сакаат.
-Тоа не требаше да излезе, не требаше да се појави, не ни е потребно сега, не постојат такви мислења, никој нема таков став, па дури ни тој што тогаш го кажал тоа, вели Антимос.
Во меѓувреме во Грција продолжува објавувањето на доверливи документи од американските амбасади. Овој пат од Атина, за средбата на Спенхарт со Димитрис Друцас во јануари минатата година, како подготовка за посетата на САД на премиерот Папандреу и тогаш алтернативниот министер за надворешни работи на Грција.
Американскиот амбасадор го советувал Друцас да покажат храбри потези за долгогодишните регионални проблеми за да имат повеќе аргументи за средба со Обама, особено ако се земе во предвид долгата редица лидери кои чекаат да се сретнат со американскиот претседател.
Според дописот од Викиликс на 30 јануари, Спенхарт му посочил на Друцас дека Вашингтон е подготвен да разговара за суштината и за она што Грција е подготвена да прифати во однос на проблемот со името, велејќи дека за САД главните елементи на договорот би можеле да бидат ерга омнес име со географска одредница за меѓународна употреба, во кое не би бил вклучен идентитетот и кој нема да се посочи во некоја од точките за пристапување во ЕУ.
Сања Ристовска- дописник од Грција
